slideshow_03.jpg

il puresser en scola

Duront entginas jamnas ein ils scolars dalla 1. & 2. classa sefatschentai cul tema bein puril. Duront las lecziuns en scola han els denter auter empriu tgei ch’ils animals dil bein puril maglian, tgei products che derivan dils animals ni tgei products che vegnan fatgs ord latg. Els han astgau eleger animals dil puresser, rimnar informaziuns e far referats. Per ils scolars dall’emprema classa ei quei stau lur emprem referat.

En connex cun il tema vein nus visitau il menaschi puril dad Ines e Daniel Monn a Rueras. Leu han Ines e Daniel mussau a nus lur asens, gaglinas, vaccas, vadials e cunegls. Ils affons han giu massa damondas ed Ines e Daniel han priu peda da rispunder a tut quellas. Ils affons han astgau ir en stalla ed han pervesiu ils animals ed observau els. Els han giu grond plascher da strihar ils vadials e da veser igl asenet. Daniel ha declarau a nus co igl automat da dar latg als vadials funcziunescha. Silsuenter ha Daniel mulschiu cun la maschina, mussau a nus co ei vegn fatg groma ed ils affons han era astgau far pischada. Sco finiziun vevan Ines e Daniel preparau per nus ina buontad marenda cun atgna carn e latg frestg. Nus vein giu il dètg gaudi e schau gustar mordio tut quellas bunas specialitads.

In’jamna pli tard vein nus visitau il menaschi puril dad Iris e Cyril Steiger a Zarcuns. Avon ch’entrar en stalla ha Cyril instruiu nus co secuntener ella vischinonza dils dus tgauns da protecziun Kiwi e Pablo. Ils affons eran fetg spanegiai ed entgins vevan empau respect dils tgauns cun lur statura impressiunonta. Entrai en stalla, ein Kiwi e Pablo s’avischinai plein marveglias. Ils affons han schau ferdar aschia sco Cyril veva mussau ed aschia ei l’emprema sentupada gartegiada. Ils affons han immediat engartau ils bellezia anseuls. Els han strihau e purtau els. Enqual affon ha spert giu anflau in ansiel preferiu e serrau quel el cor. Era Pablo e Kiwi han gudiu la viseta dils affons ed ein bein savens sebess giun plaun per guder las carsinadas. Ils affons che han giu dapli respect dallas cauras han Iris e Cyril accumpignau cun bia pazienzia. 

Ines, Daniel, Iris e Cyril han instruiu ils affons cun grond plascher e mussau ad els ina massa. Engraziel fetg ad els per tut la premura e las breigias.

Sco punct culminont tier il tema “bein puril” vein nus fatg il teateret dil pur e la pura che van cun lur animals en vacanzas. Ils affons han giugau lur rollas cun grond plascher ed han astgau sepresentar avon in numerus publicum.

Arrivada la primavera ein ils affons lu aunc semess alla lavur sil funs da Daniel ed Ines ed han rimnau mordio ragischs da lavazzas.

 

   

Questa pagina-web fa diever da cookies. Cun "acceptar" ils cookies sas Ti acceder tut ils cuntegns senza restricziun; cun "refusar" san certas funcziuns esser limitadas.