slideshow_05.jpg

Tgei less jeu daventar cu jeu sun gronds?

 

 Quella damonda fatschenta adina puspei ils affons da scoletta e bia gadas dat ei interessantas discussiuns tier quei tema. Suenter las vacanzas da Nadal havein nus tractau il tema mistregns. Entschiet havein nus culs mistregns che han da far cun la sanadad, surtut culs mistregns dil spital.  Il cantun dalla stiva da poppas ei vegnius transferius en in spital e leu han ils affons astgau esser miedis, anestesists, pazients ed aunc bia auter. 

 Suenter sedai giu da rudien cun mistregns da sanadad havein nus midau branscha. Ils affons eran buca pertscharts contas persunas che ston luvrar per ch’ins sappi ir cul tren da Sedrun a Mustér ni era vinavon tochen Cuera ni schizun Paris. Il Severino ha declarau en detagl las lavurs che ston vegnir exequidas alla staziun. Cunquei ch’el ei meinatren tier la MGB havein nus perfin astgau seser en ina locomotiva e carrar entgins meters cun ella. Impressiunont eis ei stau da veser il taglianeiv che ha da far liber il pass Alpsu dallas nevadas.

 Silsuenter havein nus priu il mistregn dil spazzatgamin sul la marella; ei era planisau che nus mondien sco spazzatgamins al til da tscheiver. Per il til havein nus zambergiau las scalas e las capialas dils spazzatgamins ed ils babs dils affons han construiu ina gronda casa cun in liung tgamin.

 Plinavon stevan ils mistregns che han da far cun maglias sil program. Che pasterners e cuschiniers hagien da far cun producir maglias, han ils affons saviu immediat. Mo tgi ch’il signun ei, han buc tuts saviu. Per emprender d’enconuscher meglier quei mistregn havein nus visitau la cascharia a Mustér. L’Alma Defuns ha declarau detagliadamein co il latg vegn elavuraus. La finala havein nus sez saviu producir caschiel frestg sco ils signuns. Ad entgins affons ha il caschiel frestg gustau grondius, auters han cuschentau la fom cul paun.

Pli tard havein nus aunc perscrutau mistregns dil baghetg e mistregns manuals. Per quella davosa etappa eis ei stau pusseivel da far ina viseta en la scrinaria Giossi SA a Rueras. Igl Ursin ha priu peda da mussar danunder ch’il lenn vegn, tgei sorts ch’ei dat e lu era mussau la via d’in’aissa; dalla buora tochen tier pintgas bialas aissettas. Bia maschinas ein vegnidas en fucziun per quei process e sco finiziun havein nus astgau prender en scoletta las aissettas per sez far da scrinari.

 Sco finiziun dil tema mistregns havein nus visitau la Distec a Mustér nua che dus babs lavuran. Il Pierino ha raquintau caussas zun interessantas ed informativas dalla producziun ella Distec ed ils affons han saviu prender material e tocca entamaun. Silsuenter spitgavan sin nus ils emprendists ed els ein sededicai cumpleinamein als affons pigns cun declarar e mussar maschinas. La finala ein ils affons stai sez vid ina maschina ed han fravagau sco il bab dil Kian e digl Ayden.

Havend luvrau sco ils gronds e cun in sacados plein surpresas e dus giugs ch’ils affons han astgau producir sez, havein dus dau adia alla Distec.

 Cun quella viseta ei il viadi tras il mund da mistregns ius alla fin ed ils affons han astgau rimnar massa bialas experientschas. Igl ei adina bi e secapescha insumma buc da sesez che nossas firmas e fatschentas han aviert las portas, priu peda per nus e dau envesta en lur mistregns e clamadas. Engraziel da tut cor grondamein persuenter.

Per tgei clamada ch’ils scolarets vegnan a sedecider en in pèr onns stat aunc ellas steilas. Denton zatgei ei franc; giavischs ein gia uss avonmaun.

 

   

Questa pagina-web fa diever da cookies. Cun "acceptar" ils cookies sas Ti acceder tut ils cuntegns senza restricziun; cun "refusar" san certas funcziuns esser limitadas.