jamna da project
La davosa jamna avon las vacanzas ei stada uonn empau pli speciala per nos scolars. Communablamein han els astgau guder ina jamna da project da Nadal.
Gia avon quell’jamna han ils affons exercitau pruamein canzuns da Nadal cun lur scolastas da cant. Questa jamna han ins aschia gia saviu udir bienmarvegl las canzuns ora el liber. Tut ils scolars, da pign entochen grond, ein sepreparai per lur concert dalla gievgia sera.
Suenter il cant communabel han las gruppas mischedadas saviu visitar differents posts. Els han per exempel saviu far creflis. Cun gronda premura han els smaccau e turschau pasta, formau creflis en tuttas fuormas ed alla fin han els saviu zambergiar satgets per lu era purtar a casa in u l’auter crefli. Grond e pign ha secapescha era magari stuiu schigiar in tec per far la segira che tut gartegi e che negin scumbegli sal e zucher. Tgi schagia pli bugen la pasta e tgi pli bugen ils creflis aunc caulds.
Sin in auter post han els saviu zambergiar latiarnas. Mintga di han ils scolars cuntinuau cun la lavur dalla gruppa precedenta. Aschia ein bellezia latiarnas da cuppas e glasa vegnidas creadas e sco davos pass coluradas cun fleters e colurs d’acril.
Sil post Nadal en autras tiaras han ils affons saviu visitar differentas stanzas ed aschia entrar en Svezia, Grönlanda, ellas Filippinas, ell’Africa, en Frontscha, ell’America ni ella Gronda Bretagna. Co vegn insumma festivau leu Nadal? Tgi porta ils pachets? Tgei maglian ins da Nadal en quellas tiaras? Quei ein mo stadas entginas damondas, las qualas ein vegnidas rispundidas sin quei post. Ils biars han schau gustar la tradiziun americana da beiber tschugalata caulda cun marshmallows. Ils auters han giu plascher vid il giug da cartas dils pudings ord la Gronda Bretagna ni da zambergiar il cor da Julehjerte ord la Grönlanda.
Il quart post era dedicaus al zambergiar cartas. Ils gronds han gidau ils pigns da tagliar, taccar, malegiar e perfurar figuras e fuormas. Cun cordas, nuvs e buls ni tut tenor fantasia era autras caussas han ils scolars e las scolaras decorau lur cartas. Era las cuviartas han els zambergiau sezs ord pupi da colur. Ils gronds han gidau ils pigns da scriver lur salids per geniturs, tats e tattas ni era padrins e madretschas.
Cuort avon miezdi ein ils scolars adina puspei returnai tier lur scolasts ni scolastas da classa. In cuort mument per rituals, usits ed autras acziuns e pendenzas en classa.
Ils suentermiezdis ein stai fetg varionts. Entginas classas ein stadas fetg sportivas ed han montau ils skis da cuorsa liunga.
Il gliendisdis han ils scolars dalla tiarza primara e dil scalem ault beneventau ils pensiunai ad in suentermiezdi da giugs. Igl ei stau fetg bi da mirar co giuven e vegl han tschaffen da dar troccas ni auters giugs. Per puspei rimnar forzas suenter haver spiars in giug ha ei dau petta e caffé.
In auter suentermiezdi ei vegniu creau sculpturas da neiv che decoreschan ussa il plaz da pausa. Muort las temperaturas fetg cauldas ein ils nanins denton vegni in techet pli satels.
Ils scolars han astgau guder in suentermiezdi da kino. Cunzun als pigns ha Herbie, igl auto tut special, fatg gronda impressiun. Mo era ils gronds han astgau guder interessants films. Secapescha ch’il popcorn ha buca astgau muncar tier aschia in eveniment.
La gievgia sera ha la scola Sedrun envidau al concert da Nadal sin plaz pausa. Las latiarnas zambergiadas duront l’jamna ed il punsch cauld han creau in’atmosfera festiva. Igl ei stau nundetg bi d’udir e cantar alla fin “Clara notg” ensemen ed aschia finir quella sera.
Il venderdis han las classas terminau la jamna els ciclus. Tgi ha dau lotto, tgi ha fatg giugs da rolla ni dau auters giugs. Il scalem ault ha organisau in turnier da Mariocart e fatg da sezuppar. Allas 12.00 ein tuts s’entupai ella sala Cristalla per guder in buontad gentar communabel e per finir l’jamna cun ina davosa canzun da Nadal.
Nus giavischein a tuts bialas fiastas ed in bien niev onn.
