slideshow_11.jpg

Sera da striegn culla 1. e 2. classa

Scolasta Doris ha priu atras sco tema en scola la stria Zilly ed il  far striegn. Els han era empriu sez da far striegn e han astgau mussar quei ad autras classas. Els eran loschs, ch`els sappien far zatgei che tschellas classas capevan buca. Per finir giu il tema ha la scolasta lu organisau ina sera da stiregn cun in magier. All`entschatta ha ella raquintau ina historia dalla stria Zilly co lezza leva striunar in bien cumpogn. Suenter sco punct culminont ha il magier Noa Luca astgau faszinar ils affons cun ses trics. Noa Luca Demund ei miu figliol. El ha 17 onns, ei egl emprendissadi sco polygraficher e stat giu Cuera. Cu Noa Luca era circa aschi vegls sco ils affons haveva il tat Alfons da Camischolas mussau ad el ils emprems trics cun cartas. Quei veva faszinau el aschi fetg che Noa Luca ha lu beinspert giavischau ina scatla da far striegn e lu trenau fetg bia. Il far striegn accumpogna pia Noa Luca atras sia veta. El va negliu senza sias cartas. Dapi lu ha el trenau fetg bia uras e perfecziunau ses trics.

Noa Luca ha delectau els ina mesura cun trics. Ils affons han era astgau gidar el a far ils trics. Digl esser surstai stevan ils affons mintgaton cun bucca aviarta avon Noa Luca. Suenter han ils affons lu vuliu mussar al magier co els sappien far striegn e tgei ch`els hagien empriu il davos temps. Era il tat Alfons ei staus presents e ha saviu guder per l`emprema ga ina presentaziun pli gronda da siu biadi.

Suenter in bien toc petta e cun in autogram en sac ein tuts turnai cuntents a casa. Tgisa da tgei ch`els han semiau quella notg?