Viadi d'atun dalla scoletta

Il viadi dad uonn ha menau nus sur cunfins tier ils Uranes. Tochen sigl Alpsu havein nus priu il tren e da leu ha la gondla transportau nus sin il “Schneehühnerstock”. Tgei gaudi che quei ei stau che l’entira scoletta ha giu plaz en ina soli suletta pintga cabina. Uonn ei quei pusseivel cun 11 scolarets. Arrivai sisum havein nus contemplau ils imposants cuolms entuorn ed entuorn e la finala era viu il lag e las rodas da vent dil Gütsch, entginas da nossas finamiras. Tochen “Platten” havein nus priu la gondla engiu e silsuenter caminai tochen tier il lag per far noss’emprema pausa. La vesta sil lag ei adina magnifica e quei ha carmelau tuts da seser giu in mumenet, seruassar e magliar enzatgei bien ord il sacados.

Suenter haver contemplau las muntanialas ei il viadi ius vinavon a pei tochen il Gütsch e silsuenter cun la gondla engiu. Il “grande finale” dil viadi spitgava nus tier il Nätschen, numnadamein la biala nova plazza da giugs. Suenter il gentar han ils affons saviu sedivertir sin quella grondiusa plazza da termegliar e tier negin fuss la stauncladad stada da sentir suenter la tippada a pei.

El tren anavos a Sedrun fussen entgins bunamein sedurmentai. Denton tier in viadi en buna  cumpignia astgan ins gie munchentar schuber lidi nuot!