Musical: Manuel alla tscherca da siu talent
Nus dil scalem primar havein presentau la sera dils 24-06-2022 in musical. Il musical cul tetel «Manuel alla tscherca da siu talent» tracta d’in buob che enquera siu talent. Planisau era da far il musical gia 2020. Pervia da corona ha quel denton stuiu vegnir stuschaus sin primavera 2022. Scolaras e scolars, scolastas e scolasts han luvrau siat jamnas vid quei musical – oravontut duront ina jamna da project intensiva.
L’idea dil musical sez ei buc vegnida da nossas scolastas e nos scolasts, mobein dalla scola da Sagogn che ha giu translatau e presentau quel per romontsch. Las canzuns ed era il teater ha la fin finala aunc stuiu vegnir adattai per nus.
Exercitar – exercitar – exercitar
Sco emprem vein nus saviu encurir ora sche nus vulevan far teater ni segidar cun culissas ni autras caussas. Suenter che nus havein giu survegniu las rollas havein nus giu d’emprender ordadora quellas a casa. Suenter las vacanzas da primavera essan nus allura i mintga jamna a trenar il teater. L’Aurelia e Doris han trenau cun nus las canzuns; quellas havein nus lu trenau e trenau en classa e pér lu cantau communablamein. Noah e Matia han accumpignau nus cun battaria, Curdin e Simon culla ghitarra. La Madeleine ed il Gion han filmau il musical all’emprova generala.
Las culissas han Nicoletta, Nicole e Nicolina skizzau cun rispli e suenter havein nus scolaras e scolars colurau quellas. Silsuenter ha la Nicole fatg in sistem da trianghel e mess quellas culissas ensemen cun Sandro sin rodas; quei ei ina tecnica ch’il scolast Beni ha giu mussau.
Duront l’jamna da project essan nus i mintga di giun halla veglia e lu trenau inaga da giugar il musical. Quater da nus han giu negina rolla ed han stuiu scriver duront quell’jamna in text, far in video, fotis ed intervestas cun scolaras e scolars, scolastas e scolasts che separticipeschan.
Per quels che han buca giu dad exercitar il teater han las scolastas ed ils scolasts giu organisau posts p.ex. da far tuors cun lennets ni da far musica far cun cappla ed aunc bia auter.
Manuel alla tscherca da siu talent
El musical dat ei affons cun differents talents p.ex. ir cun tractur, dar ballapei, enconuscher las locomotivas, saltar, cantar e saver quintar fetg bein. In dils affons ha denton negins talents, quei ei Manuel. El emprova d’anflar in talent – mo senza success.
Duront la jamna da project en lur scola vala ei d’anflar il pli grond talent dalla classa –e Manuel vul lu star a casa. Mo duront quella jamna anflan ses conscolars in talent dad el. E lu vegn el eligius sco scolar cun il meglier talent dalla classa. Ins sto buc haver talents ch’ins vesa – ei sa era esser talents zuppai, sco saver tedlar tier, haver pazienzia e saver star ruasseivels.
1. e 2. classa han giugau in agen toc el musical; els separticipassen atgnamein era bugen a quell’jamna da project dils gronds. Els han numnadamein era talents e resdan sur da quels. Els san p.ex. far muffins, enconuschan ils nums dalla gronda part dils dinosaurs, anflan bellezia cristallas, san ir stortas da slalom e leger cun fatschas.
Tuts han bugen fatg cun al musical ed a quell’jamna da project. Igl ei stau bien da far enzatgei different enstagl scola. Ei ha plaschiu a tuts da cantar e giugar las rollas. Ei ha era plaschiu da far posts cura ch’ins stueva buc exercitar. La presentaziun ei la finfinala gartegiada e tuts han giu plascher.
Text e fotografias dad Afonso, Leonor, Marco e Tim
