slideshow_05.jpg

pigns e gronds communablamein en cuschina

Ils scolars digl emprem scalem ault han il rom cuschinar duront quei onn da scola. Duront quellas lecziuns eis ei fetg impurtont a mi ch'els emprendien aschi bia sco pusseivel per ch'els seigien semtgai cu els han lu sezs da menar in percasa. Ils menus ein aschi varionts ch'els emprendan atgnamein tut las tecnicas da cuschinar. Nus cuschinein adina menus da treis gangs. Els cuschinan, maglian ensemen ed han lu era da lavar giu e schubergiar la cuschina, quei ch'ei buc adina aschi lessig. Mo aschia ei era la veta ella realitad.

La mussadra Romana cuschina uonn mintgaton cun ses scolarets dil secund onn da scoletta. Era els cuschinan mintgaga ensemen e maglian lura en scola. Aschia havein nus giu l'idea che nus savessien inaga ir cun tut nos 19 cuschiniers giun cuschina e cuschinar ensemen – pia gronds e pigns.

Il menu ei gleiti staus eligius; ei ha dau ligiongias vienesas en pasta cun salatas e differentas sosas. Il dessert ha naturalmein era buca astgau muncar, split da bananas cun glatsch da vaniglia e sosa da tschugalata garniu cun groma e smarties.

Suenter pausa ein tuts serimnai en cuschina e lu sereparti sco quei che nus vevan partiu en els. Tuts eran empau schenai. Ils gronds ein disai da cuschinar persuls, aschia han els giu da declarar e mussar als pigns tgei ch'igl ei da far e lu era cuschinar ensemen. Igl ei stau aschi bi da mirar co pign e grond lavuran, segidan e sestellegian ensemen. Era metter a meisa e faldar bialas serviettas ha ina gruppa giu da far. Nus duas scolastas havein strusch stuiu gidar els. Da miezdi havein nus lu astgau guder in prima gentar. Tuts vevan la dètga fom. La schenadadad era svanida e pign e grond ha giu ils dètgs discuors. Suenter gentar han tuts lu giu da gidar a lavar giu la vischala e schubergiar la cuschina. Quei ei stau ina biala exprientscha. 

 

text da Nicoletta Marino

fotografias da Nicoletta Marino & Romana Deragisch-Hendry