slideshow_11.jpg

til da tscheiver 2022

Suenter dus onns puspei astgar far tscheiver cun in til empau reduciu e quei sco suletta vischnaunca lunsch entuorn – tgi havess tertgau quei? Aschia ei la euforia stada aunc bia pli gronda che normalmein. Suenter las vacanzas da Nadal han las scolaras ed ils scolars entschiet a preperar las mascras tier il tema eligiu per lu astgar sepresentar el til. Bein savend che la realisaziun d’in til sco quei ch’il cor giavischa steva aunc empau ellas steilas, ei la motivaziun buca stada pli pintga ch’ils auters onns. Pér cuort avon il di da Gievgia grassa han era aunc autras guggas decidiu da vegnir ella Val Tujetsch per separticipar al til ensemen cun ils Vagabunds. La finala ei il til vegnius accumpignaus da quater guggas. 

Cun grond’agitaziun ein las gruppas sepinadas avon scola la quei di. Pign e grond selegrava ch’ei entscheivi proximamein. Culs emprems tuns dils Vagabunds ei il til semess en moviment e la via ha menau da via s. Onna viaden per semenar silla via cantunala encunter la Tgèsa Communala. Massa confettis e dultschergnem ein vegni sittai entuorn ed ei ha dau ina biala tempra da tscheiver cun differents costums e mascras coluradas e massa tuns tscheivrils.

Ils aspectaturs che spitgavan cun marveglias han schau plascher il til. Per ils participonts sco era per ils aspectaturs ei il pign carin til staus in grond eveniment suenter in temps malguess.

Suenter il til han las scolaras ed ils scolars ed ils aspectaturs aunc saviu guder in tec atmosfera da tscheiver sil plaz Dulezi e las guggas han dau in pign concert. 

Allas quater ei il tscheiver el vitg staus alla fin ed ils concerts dallas guggas han cuntinuau el territori da skis duront la sera da Snownight.

 

text dad Anna-Lea Deragisch

fotografias da Nicoletta Marino, Nicole Solèr, Anna-Tina Solèr, Anna-Lea Deragisch & Valerio Konrad