slideshow_11.jpg

refrestgament digl emprem agid

Sin viadis da scola, duront gimnastica sco era el mintgadi da scola dat ei adina puspei pigns incaps nua ch’ils affons drovan in plaster ni in tec glatsch per sferdentar ina budella. Aschiditg ch’ei resta "mo" tier quei ein tuts suenter in mument puspei cuntents. Denton ein tuts pertscharts ch’ei sa era dar in pli grond accident cun in affon. Da quei ha franc mintgin grond respect. Per quei motiv sesprova il cerchel scolastic da Sedrun da refrestgentar da temps en temps la savida digl emprem agid. 

Ils 2 da fevrer 2022 duront in di da scolaziun dil cerchel scolastic ei Nazi Venzin, scolast tier l’Uniun samaritana Tujetsch e Mustér, vegnius en scola per far l’instrucziun en caussa. All’entschatta ha ei dau ina part teoretica e silsuenter – quei ch’ei da grond’impurtonza – ina part pratica nua che mintgin ha saviu metter entuorn la teoria ed exercitar la pratica. 

Naturalmein ei in miez di spert entuorn e tuttina ha Nazi Venzin saviu pachetar las impurtontas caussas per porscher in adequat emprem agid. Alarmar endretg sch’ei fa basegns, giudicar il pazient, star ruasseivels e far igl emprem agid pretendiu ei impurtont all’entschatta. Gie perfin al 144 eis ei vegniu telefonau sco cass da test per udir ina gada co ei tuna sch’ins sto metter en quella numera. Con ruasseivels e cumpetents che quellas persunas da l’autra vart dil telefon ein han tuts udiu e quei dat ina gronda segirtad da buc esser persuls e ch’ei vegn gidau en in seracass.

Ils accents dalla pratica ein stai la posiziun da schischament tier ina persuna senza schientscha, ligiadura da pressiun, blessuras dil dies, reanimar BLS/AED, blessuras tier surpassadas sco era uegls da viaspras ni aviuls. Duront la pratica ha ei dau interessantas discussiuns e las damondas ein vegnidas rispundidas cumpetentamein da Nazi Venzin.

Uss speran tuts ch’ei resti tier la teoria e ch’il mintgadi en scola seigi buca tuccaus da pli gronds accidents.

 

text da Romana Deragisch-Hendry

fotografias da Romana Deragisch-Hendry & Sandro Tomaschett