sils fastitgs dad alois carigiet

Ils 2 da december ein la 5. e 6. classa serendidas cul tren a Trun per in luvratori davart il renomau artist Alois Carigiet. Gia sil viadi naven dalla staziun al "Museum Cuort Ligia Grischa" han las scolaras ed ils scolars contemplau beinenqual maletg mural digl artist oriunds da Trun. 

Arrivai egl imposant baghetg dil museum ha Olivia Pfister beneventau nus. Suenter ch'ella ha giu declarau la historia dil baghetg e la muntada dils uoppens en sala da dertgira essan nus sededicai agl artist Alois Carigiet (1902–1985). Sco emprem han ils affons stuiu eruir staziuns impurtontas da sia veta cun agid da maletgs. Naturalmein ha era la historia digl Ursin buc astgau muncar. Ils maletgs originals da quei cudisch e d'ulteriurs cudischs ch'ein vegni illustrai da Carigiet havein nus silsuenter astgau contemplar ella stanza dasperas. 

Il pensum che las scolaras ed ils scolars han allura retschiert ha menau els en tuttas stanzas d'exposiziun. Leu han els stuiu tschercar il maletg tier igl extract dil maletg ch'els havevan retschiert sco copia – e la finfinala presentar lur maletg alla classa. Dad Olivia Pfister han ils affons ultra da quei aunc udiu beinenqual informaziun supplementara. Pliras ga ha ella envidau nus a contemplar ils maletgs empau pli da rudien e nus essan sefatschentai culs motivs specials sco utschals e las colurs plitost nunusitadas dils objects sils maletgs.

Per finir ha mintgina e mintgin giu da skizzar eifer treis minutas in purtret d'ina conscolara ni d'in conscolar. Ils products ein stai fetg interessants ed ils biars affons ha la classa allura era eruiu el quiz final. 

Il retuorn atras il vitg havein nus allura aunc inaga mirau pli exact sils mirs dallas casas sper via e viu las ovras dad Alois Carigiet cun auters egls. 

fotografias da Sandro Tomaschett