slideshow_04.jpg

notg da raquents en scola sedrun

Venderdis sera ils 12 da november ha la Scola Sedrun envidau tut ils interessai alla “Notg da raquents”. Agl invit han ina pluna affons dau suatientscha; quella sera han ils organisaturs numnadamein astgau beneventar buca meins che 30 affons. 

Ils affons dil ciclus 1 han astgau serender en scoletta. Leu han las scolastas Doris e Romana raquintau las aventuras digl uors “Ursi”. Cun bucca e nas ei vegniu tedlau – e per part era smarvigliau tgei che “Ursi” ha tut fatg sin siu viadi. Silsuenter han ils affons sezs astgau far dad uors e baghegiar lur atgnas taunas. Tgei gaudi ch’els han giu da mussar in a l’auter lur dacasa. Suenter ina cuorta pausa ed haver fatg uorden han els allura saviu zambergiar e colurar agens segns da leger. La finfinala han els allura aunc astgau sfegliar e leger en differents cudischs preparai. 

Las scolaras ed ils scolars dil ciclus 2 han per entscheiver retschiert da scolasta Sabrina e scolast Sandro in’introducziun davart Alasca ed il marcau Nome – il liug nua che la historia da “Balto e Togo” gioga. Silsuenter han els astgau prender per gruppa in iPad; cun quel han els astgau ir per la scola entuorn, tedlar las singulas parts dils raquents cun agid da codes QR e rispunder allas damondas dalla cruschera. Ils affons han stuiu gizzar bein las ureglias per eruir las sligiaziuns. La finfinala eis ei reussiu a tuttas gruppas dad emplenir communablamein la cruschera. 

Per finir ein allura tuts serimnai en scoletta pintga per in toc petta ed in migiel sirup. Ils affons fussen aunc stai ditg en scola quella sera, denton ha era tut il bien ina fin. Ils organisaturs ein satisfatgs dalla sera ed il resun dils affons ei staus pli che clars: Els han schau plascher la “Notg da raquents” en Scola Sedrun. 

 

fotografias da Doris Friberg, Romana Deragisch-Hendry, Sabrina Suppiger-Hendry & Sandro Tomaschett