slideshow_09.jpg

in eveniment suenter l'auter – viadi dalla scoletta

Ils 28 da matg da fina bialaura ei la scoletta da Sedrun semessa sin viadi cul tren direcziun Mustér. Ad Acla da Fontauna spitgava ina surpresa e negin dils affons sminava propi tgei. La supresa eran gronds bals suflai si ch’ins sa ir en e serullar dil plaz vi. In nundetg gaudi! Da miezdi spitgava sin nus il gentar el Catrina Resort e cun gronda fom havein nus astgau guder buns spaghettis. 

Sco proxim ei la viseta tier ils pumpiers stada sil program. Ils affons spitgavan vess da saver ir a visitar il local da pumpiers, pertgei dapi entginas jamnas ei il tema pumpiers actuals en scoletta ed els han empriu in tschuat dil tema pumpiers. Tut nervus e plein tensiun han ils affons tedlau tgei ch’il cumandant da pumpiers Gion ha giu da raquintar ensemen cun ses gidonters Sandro e Pierino.  

Era l’ambulanza e la polizia ein aunc stadas sil plaz e schau cuchegiar els vehichels e mussau il material ch’ei lien. Ils affons han astgau prender part dapertut 1:1 cun sezs astgar empruar ora e tuccar en las caussas. Las fotografias che suondan tschontschan per sesezzas. La fascinaziun da sirenas ei tier affons fetg gronda ed aschia ein ils affons vegni cumpleinamein sin lur cuosts. Mintg’auto ha schau resunar sia sirena e schau ir cazzolas en tut las variantas. 

In sincer engraziel fetg a tut las persunas che ha possibilitau a nus quei bellezia e nunemblideivel di. Igl ei grondius che nus havein persunas engaschadas che prendan peda per mussar e declarar cun bia pazienzia lur passiun dil mistregn ni dalla lavur voluntaria da pumpier.

 

fotografias da Romana Deragisch-Hendry & Flurina Manetsch