slideshow_05.jpg

jamna da scola da skis dalla scoletta

L’jamna da scola da skis duront il meins da schaner ei gia quasi tradiziun en nossa val. Era uonn sut las circumstanzias actualas han ils affons da scoletta saviu guder in’jamna varionta sin pista. Mirau dall’aura anora ha ei giu quels tschun dis temperaturas freidas cun tschiel blau tochen nevadas ed in tec cufla. Era sin las pistas ei vegniu purschiu variaziun.

Il gliendisdis ein tut ils affons stai si Valtgeva ed il secund di han ils affons dalla gruppa ferma astgau ir el territori grond. Pia ha ei giu num serender cun la pendiculara sil Cuolm da Vi e leu isar pista e runal da taglier. Era silla pista enta Dieni han entgins affons astgau schar filar lur skis e quei tier nevadas ils ulteriurs dis. Mintg’affon ha saviu trenar sias habilitads e segiramein ha mintgin fatg in enorm progress en quell’jamna. 

 

Sco gia menziunau eis ei stau in’jamna varionta dil program sco era dall’aura. La notg sin gievgia haveva ei dau ina sfraccada neiv e quei ha pretendiu dils manischunzs da pista da levar baul per preparar las pistas. Si Valtgeva sco era enta Dieni neveva ei da camifo ed ei regeva ina bellezia atmosfera. Empruar dad ir neiv nova e sebetter els mantuns neiv ei propi stau in’aventura ch’ins ha buc mintga di.

Cunquei ch’igl ei buc stau lubiu da far occurrenzas publicas ha la cuorsa dil venderdis giu liug intern ellas gruppas senza publicum e fans. La rangaziun cun surdada dalla meritada medaglia ha mintga gruppa fatg denter els sco «grande finale» dall’jamna da skis.

Igl ei stau in’jamna varionta cun bia bials muments. In engraziel fetg s’auda d’admetter als scolasts da skis per lur engaschi e pazienzia. 

 

fotografias da Romana Deragisch-Hendry