slideshow_05.jpg

viseta da sontgaclau tier ils affons da scoletta

Tgei bellezia atmosfera venderdis endamaun, ils 4 da december 2020! Ei haveva dau ina féffa neiv e nus dalla scoletta eran sin via encunter igl uaul  per encurir ed observar fastitgs d’animals selvadis. Strusch che nus eran in tec allontanai dil vitg da Rueras han ils affons gia anflau ils emprems fastgitgs da lieurs. Las egliadas dils affons eran fixadas giun plaun ch’ei han gnanc priu ver tgi che vegneva tuttenina da via si – il Sontgaclau accumpignaus digl asen e da dus gidonters. Cunquei ch’ils affons san ch’il Sontgaclau viseta buc els a casa uonn ei la surpresa stada aschi gronda che tuts ein stai eri sco candeilas da glatsch. Cun egls glischonts ed ina fatscha emplenida da smarvagl han els beneventau Sontgaclau e sia truppa cun plascher e cor aviert. Nies plan dad ir alla tscherca da fastgitgs havein nus en quei mument emblidau e nus essan suandai il Sontgaclau. 

Avon stalla dil Nevio ha il Sontgaclau priu plaz e raquintau a mintg’affon enzatgei. Naturalemein ch’era ils affons havevan da raquintar massa caussas al Sontgaclau. La finala ein els in entir onn buc sevesi.

Tuttenina eis ei stau uras per il Sontgaclau da prender la via sut ils peis per serender encunter casa. Nus havein aunc magliau piziulta, buiu punsch e giu da mirar las vaccas ed ils carins vadials da Nevio. Denton era per nus ha ei lu beingleiti giu num da serender encunter casa ed ir a cauld. 

Sco mintg’onn han ils affon gudiu la sentupada cun il Sontgaclau ed els selegran gia uss sin in auter onn cura che Sontgaclau viseta puspei els. 

 

fotografias & film da Romana Deragisch-Hendry