slideshow_10.jpg

tema crappa ell'instrucziun dalla 1. & 2. classa

Duront las davosas jamnas ha il tema crappa accumpignau nus duront las lecziuns da natira & human. Ils affons han empriu danunder che la crappa vegn, ord tgei che la crappa ei e per tgei ch’ins drova crappa. Plinavon han els saviu emprender d’enconuscher la crappa preziusa sco era nossas bialas cristallas. 

Guido Friberg ha mussau als affons la maschina che rumpa crappa e producescha differenta grondezia da crappa. Guido ha era declarau als affons per tgei ch’ins drova la differenta crappa. Las grondas maschinas han fascinau ils affons, cunzun ils buobs.

Barla Monego ha visitau nus sin plaz scola e mussau a nus la biala crappa preziusa. Ella ha raquintau dalla forza dalla crappa e lur effect silla sanadad. Barla ha presentau a mintg’affon siu crap da cletg e regalau a tuts dus bials craps. Ils affons ein stai fascinai dalla forza dalla crappa e da lur diversitad. 

Il tema crappa ha era accumpignau nus sin nies viadi d’atun. Ciril e Giusep Monn han menau nus sur il Cuolm da Vi nua ch’els han cavau cristallas culs affons. Silsuenter vein nus aunc astgau contemplar las bialas cristallas el museum La Truaisch.

Ciril Monn ha regalau a nus in tschuat minerals, ils quals nus vein saviu contemplar pli da rudien cun il microscop. Ils affons ein stai fascinai ed han empriu in tschuat nums da minerals.

Duront las lecziuns dad art figurativ, textil e tecnic ha la scolasta Nicoletta colurau culs affons bellezia crappa sco era zambergiau il giug «tic, tac, toe».

Igl ei stau in bi mirar co il tema crappa ha svegliau igl interess e la fascinaziun dils affons.

Nus engraziein grondamein a Barla, Guido, Giusep e Ciril per lur grondas breigias e ch’els han priu la peda da parter lur savida cun nus.

 

fotografias da Doris Friberg & Nicoletta Marino