slideshow_07.jpg

raccolta da truffels

Uonn havein nus dalla scoletta puspei astgau segidar cugl Edi Hess da raccoltar ils truffels enta Dieni. Cun calzers aults, resti da luvrar, vons e zeivers essan nus stai pinai ina damaun da bellezia aura avon il nuegl dad Edi. Cunquei che Edi pratichescha bia lavurs agricolas cun ses cavals ei quei era stau quei di il cass. Igl Edi ha mess si cumet als cavals e semtgau els per la lavur sil funs. Naturalmein che quei ha interessau ils affons ed els han era fatg interessantas damondas.

Avon ch’ir sil funs han ils affons astgau beneventar e carsinar ils dus cavals – tgi cun enorm plascher ed auters cun empau respect ni insumma buc. Quei respect ei denton sesligiaus tec a tec il decuors dil di. Ils affons han era udiu dad Edi cu els ston haver quitau e co els han sedepurtar entuorn ils cavals.

Ensemen essan nus silsuenter i sil funs e sco emprem ha Edi sluccau l’era cul criec. Cons truffels ch’eran sezuppai sut il tratsch e ch'ein vegni neunavon cun agid dil criec. Mintga truffel, in suenter l’auter, han ils affons priu e mess en lur zeiver. Tuts han luvrau sco furmiclas. «Jeh, mira co tgei leigher truffel!» ni «Ju a anflau il plé grond truffel!», udevan ins neu dil funs. Ed en buca ditg ei il carr annex gia staus emplenius empau. 

Cu il funs ei staus vulvius pliras gadas e la tiara lucca han entgins affons giu il gaudi da termagliar el tratsch, esser cavagl ni criec e mirar sch’enqual truffel pign ei aunc d’anflar.

Ils affons ein stai da buna luna ed han luvrau intensiv igl entir avonmiezdi. Staunchels e tschufs essan nus returnai a casa e nossa paga per la lavur prestada ein – co savess ei esser auter – truffels frestgs tuatschins!

 

fotografias da Romana Deragisch-Hendry