visetas dall'australia – do you speak english?

Il schaner han las studentas Maddi e Grace dall'Australia passentau lur praticum ella 5. e 6. classa. Cunquei ch'ellas san mo engles ha ei dau nuot auter che da secommunicar per engles cun ellas – ni autruisa cun peis e mauns. Cunquei ch'ellas ein stadas fetg aviartas ed han schizun empruau d'emprender certs plaids per romontsch ei il glatsch gleiti staus ruts tiels biars. Duront las duas jamnas han las scolaras ed ils scolars empriu ina massa davart ils animals e la cuntrada dall'Australia, lur giug preferiu AFL – gie schizun empruau da dar quei giug eifer las lecziuns da sport – co ins di il temps per engles, sco era las differentas colurs e fuormas. Secapescha ha il divertiment buc astgau muncar; il giug "Maddi/Grace says..." han las praticantas beinenqual ga stuiu far culs affons. 

La Maddi e la Grace ein stadas incantadas da nossa bellezia cuntrada e buca d'emblidar dallas pusseivladads da far sport d'unviern. Aschia han ellas giu la caschun dad ir a cuorsa-liunga, cun aissa e cun skis. Mo era nossas tratgas tradiziunalas svizras e grischunas han ellas astgau guder tier lur famiglias hospitontas. Ad ellas admettein in grond engraziament per la promtadad da dar in suttetg allas praticantas duront quellas duas jamnas! 

Bugen ni nuidis havein stuiu prender cumiau dad ellas ils 31 da schaner. Las scolaras ed ils scolars han schau plascher il project "Winter School" organisaus dalla PH Turitg – e tuts han profitau dad inaga saver ni stuer resdar engles per secapir. 

fotografias da Sandro Tomaschett