slideshow_01.jpg

il tschiel ha biaras fatschas

Nus dalla 5. e 6. classa da Sedrun, siat scolaras ed endisch scolars, havein tractau il tema "Il tschiel ha biaras fatschas" duront las lecziuns da natira, carstgaun e societad tier la scolasta Aurelia. L'entschatta essan nus sefatschentai cul tema dall'aura, sco proxim cul cametg e silsuenter culs prighels dalla natira. Sco davos havein nus aunc tractau il tema planets.  

Nies pensum ei staus da far in model da planets e dad encurir massa informaziuns dad in singul planet. Nus essan sereparti en differentas gruppas ed havein encuretg ideas pils models en Pinterest, Google etc. Mintga gruppa ha fatg in auter model; tgi ha zambergiau cun cartun, tgi cun ruclas da stiropor, tgi cun gep e tgi cun auters materials. In tec humor ha secapescha buc astgau muncar. Il temps ei vargaus aschi spert che in pèr gruppas han schizun giu in tec stress, denton il davos ei tut vegniu bien. Per finir havein nus aunc stuiu encurir informaziuns sur dil planet per emplenir il signalament. Leu havein nus stuiu rispunder a damondas sco p.ex. sch'ins sa viver sil planet, sch'ins sa trer flad si leu ed aschia vinavon. 

La finfinala han tuttas gruppas presentau ils models ed il planet eligiu. Las presentaziuns ein tuttas gartegiadas. Suenter las presentaziuns havein nus mess ils models en zuler in suenter l'auter sco el sistem digl univers.

Nus havein empriu bia sur dils planets duront quei project. Quei temps ensemen cun nos collegas da classa ei staus fetg cools. Nus engraziein alla scolasta Aurelia ch'ella ha gidau nus da far ils models e las presentaziuns ed al scolast Sandro che lez ha gidau nus da scriver quei text. Senza els dus fuss quei buca stau pusseivel. Quei tema ha plaschiu a nus fetg bein. 

 

text dalla 5. e 6. classa, fotografias dad Aurelia Albin-Flepp