viseta dil polizist da traffic en scoletta

Entscheiver la scoletta ei per ils biars affons in plascher – mo era ina sfida. Igl ei in grond pass ch’ei cumbinaus cun midadas: sedistaccar dalla mumma, emprender d’enconuscher ils conscolars, termagliar en ina gruppa, far il viadi en scoletta eav.

Suenter igl emprem di da scoletta tuornan ils affons loschs a casa cun lur tschenta ch’els han survegniu dallas mussadras. Purtar di per di la tschenta da scoletta ei impurtont per ch’ils pignets seigien vesibels per ils automobilists. Co secuntener sin via muossan gia ils geniturs avon ch’ils affons vegnan a scoletta. E tuttina basegna ei ch’il polizist da traffic viseta ils affons mintg’onn el decuors digl atun.

Era uonn ei il polizist Remo staus en scoletta. Quei di raquenta el als affons ina massa interessantas caussas dallas reglas da traffic, nua star sil passapei, nua star sch’ei ha negin passapei e co ir sur las sdremas ed aunc ina massa auter. Suenter la part teoretica cun figuras ed autos meina il polizist ils affons sin via, nua che mintg’affon emprova da metter entuorn igl udiu e va persuls ina gada sur las sdremas melnas, exact aschia sco il polizist ha mussau. Star eri – mirar e tedlar – sche negin vegn ir ed enamiez aunc ina gada mirar dretg e seniester. 

Tier quella part sin via dat il polizist gronda peisa ch’ils automobilists retegnien 100% lur vehichel, pertgei ils affons emprendan ch’els astgan pér traversar la via cura ch’igl auto ha las rodas che stattan eri. Buc adina ei quei pertschart als automobilists. 

Quella viseta dil polizist ei adina biala ed ei dat interessantas discussiuns e damondas – e promova la finfinala tier pign e grond il secuntener endretg sin via. Aschia sa ei vegnir evitau accidents da traffic cun affons.

Al Remo engraziein nus cordialmein per la viseta usitada che plai grondius als affons.

fotografias da Romana Deragisch-Hendry