slideshow_07.jpg

tgaun, giat e miur visetan la 1. e 2. classa

Las davosas jamnas ein ils scolars dall’emprema e secunda classa sefatschentai cun entgins animals da casa. Duront quei temps han els denter auter survegniu inaga ad jamna viseta dil tgaun Emma. Cun l’Emma han ils affons saviu luvrar en fuorma da pigns exercezis. 

Ina miur en in caset ha plinavon tratg l’attenziun dils affons en nossa stanza da scola. Mintga di ha in scolar giu il pensum da perver la miur sco era da schubergiar il caset. Els han saviu observar siu secuntener e giu plascher da sias ramurs duront l’instrucziun. Era il giat Meiki da Marlo ha fatg in di viseta en scola. El viva gest sper scola ed ei aschia staus bein disaus vid tut ils mauns che han strihau el quella lecziun. Ils affons han giu grond plascher da sia viseta, cunquei ch’il giat ei aunc adina lur animal da casa preferiu. 

Plinavon vein nus visitau la tartaruga ed ils cunegls da Rosvita Loretz. Ils affons han astgau tener la tartaruga ed empriu ina massa da quei animal da casa empau pli exotic, denton buca meins interessant e carin. Sco davos vein nus visitau ils treis pors da mar da Jael ed aschia aunc viu la moda e maniera da viver d’in ulteriur animal da casa. Il tema ha fascinau ils affons ed els han empriu ina massa, surtut il respect e la responsabladad viers ils animals.

 

text e fotografias da Doris Friberg