slideshow_01.jpg

instrucziun da traffic

Ils 27 da matg havein nus giu instrucziun da traffic en scola. Uonn han ils scolars dil scalem primar astgau guder quella instrucziun a moda pratica.

Avonmiezdi han ils scolars dalla 3.-6. classa giu quella instrucziun cun lur velos. Mintga classa ha giu l'entschatta ina cuorta part teoria, nua ch'ins ha repetiu tgei ch'il velo stoppi tut posseder per ch'el seigi adattaus per il traffic sin via. Il polizist Remo ha lu gest era controllau quellas caussas. Sche zatgi veva buca reflecturs, sche ha el gest partiu ora da quels per taccar si el dretg liug. Il polizist Cuno ha lu era gest mussau tgei premissas la capellina sto haver per ademplir la segirtad. Lu han ils affons giu da far in parcour sin plaz scola. Igl ei vegniu scolau la ballontscha, ir cun velo cun tener mo ina corna, ir slalom e tener il frein senza far dar giu ina stanga. Suenter ha ei giu num metter entuorn igl empriu ella realitad, pia sin via principala. Tuts han giu dad ir cul polizist Cuno dil vitg viadora. La pli hanada situaziun ei da semenar giu seniester per traversar la via. Quei han els lu gest stuiu trenar in pèr gadas e quei mintgamai singul. Il polizist curregeva lu direct mintgin individual, sche zatgei era buca propi stau bien. Ils affons, mo era il polizist ein stai surstai tgei grond traffic da camiuns che nus vein gest il mument a Sedrun. Quei ei denton stau in super exercezi. 

Il suentermiezdi ein ils scolars dalla 1. e 2. classa lu vegni scolai e quei cun lur trottinets. Era cheu han els gl'emprem giu ina part teoretica, nua ch'igl ei vegniu declarau ch'ins mondi cun trotti sil passapei, ch'ins stoppi haver leu quitau dils pedunzs e ch'il trotti stoppi haver buns freins. Ils polizists han era controllau cheu las capellina dils affons. Lu ein tuts serendi giu sper via principala per trenar igl empriu dalla teoria. Mintgin singul ha stuiu traversar la via principala, naturalmein silla sdrema melna. Era sch'ei vess caztgau dad ir sil trotti sur la sdrema han ils affons stuiu ir a pei e mo stuschar il trotti. Suenter han els astgau carrar dil passapei viadora entochen la proxima sdrema melna. Leu era tschei polizist che schava puspei ir ils affons sur la sdrema melna vi per carrar dil passapei viaden. Quella rundella han els giu da far entginas gadas. Suenter han era ils pigns giu da far in parcour sin plaz scola. Era cheu ei la ballontscha, il star eri sin commando ed igl ir sur in impediment vegni scolai.

Quella scolaziun pratica ei stada ina super caussa. Ils affons han propi saviu trenar en situaziuns realas las dretgas reglas. Engrazia fetg als polizists Cuno e Remo per quella interessanta instrucziun da traffic. 

 

text da Nicoletta Marino

fotografias da Nicoletta Marino & Sandro Tomaschett