slideshow_11.jpg

scomi da classa

Ils 27 tochen ils 30 da schaner ha la 5. e 6. classa astgau passentar in project tut special - numnadamein in scomi da classa cun scolaras e scolars dad ina 6. classa da Winterthur. Ils treis dis ein stai intensivs ed ils affons han gudiu la purschida speciala cun in program empau auter che usitau. 

Gliendisdis e mesjamna havein nus entschiet communablamein en scola cun posts davart nies bi lungatg romontsch, sco era davart nossa regiun ed il mardis essan s'entupai el Museum La Truaisch, nua ch'il Tarcisi ed il Ciril han raquintau a nus ina pluna da temps vargai ed oravontut sur da cristallas. Suenter quell'entschatta communabla essan allura mintgamai serendi ordaviert - tgi ha empriu dad ir cun skis a Valtgèva, tgi ei staus sin pista a Milez ed aunc auters ein i a pei, cun calzers da neiv ni cun scarsola. Il program ha purschiu per (quasi) tut ils gusts enzatgei. Gentau havein mintgamai communablamein ell'ustria a Milez. Las seras ha la finfinala giu liug in program facultativ per tgi che ha giu gust ed oravontut era aunc avunda energia per tal: il gliendisdis sera essan stai sil glatsch ed il mardis sera a far bogn. 

Pil gartetg da quei project engraziein nus zun fetg a tuttas persunas ch'ein segidadas sin ina moda ni l'autra, sco era a tuttas famiglias che han priu ils affons tier els a casa. Engraziel fetg pil sustegn e per la flexibladad!

Tut en tut ei quei stau in fetg interessant project, duront il qual nus havein saviu far enconuschientscha cun ina massa novas fatschas. Entginas impressiuns da quels dis anfleis Vus cheu sut. 

 

fotografias dad Ervin Huonder & Sandro Tomaschett