in’idea – in project – in grondius resultat

Igl atun vargau havein nus giu il tema universum en scoletta. Quei ei stau in tema che ha fascinau nus ed alla fin eran nus pigns experts da planets, rachetas ed astronauts. Quei ei stau per nus mussadras il motiv daco che nus havein eligiu astronauts sco sujet per il til da tscheiver 2016.

Denton astronauts senza racheta….va quei insumma? Ina racheta duvrassen nus bunamein era per ir atras il til. Perquei havein nus plidentau ils babs dils affons e dumandau sch’els segidassen e baghegiassen per nus ina racheta. Il resun ei immediat staus positivs ed aschia era nossa racheta per il til da tscheiver garantida.

Ina sera il schaner essan nus s'entupai cun ils babs che havevan peda e tschaffen da segidar. 11 umens plein ideas han entschiet ad organisar, discussiunar e planisar. Tuts eran motivai e plein energia ed il project era sin buna via.

Aschia ei la racheta naschida e carschida tec a tec giu el magasin dalla firma Loretz. Cu umens cun ideas senza fin s'entaupan e lavuran ch’ei fema ei il resultat la finala pli gronds che quei che nus havessan s’imaginau.  Igl enorm e nunstunclenteivel engaschi ei admirabels. Per ils affons ein lur babs vers campiuns. In stagn e cordial engraziel fetg.

Era nos pigns campiuns en scoletta, ils affons, han luvrau mordio. Els han creau lur capellinas, ils sacados d’aria e las bandieras ch’ein vegnidas taccadas silla racheta cun bia premura. 

Aschia havein nus astgau semussar cun grond plascher e quet da gievgia grassa el til da tscheiver 2016. Cunquei ch’igl ei vegniu luvrau tontas uras ed ei fuss stau donn suenter mo in til da prender dapart puspei tut essan nus sedecidi dad era ir culs affons sco astronauts e cun la racheta el til da tscheiver a Mustér. 

Nus admettein in cordial engraziel fetg alla firma Loretz per metter a disposiziun la localitad ed il vehichel ed a tut nos sponsurs per ulteriur material e sustegn.

fotografias da Romana Deragisch-Hendry