slideshow_04.jpg

viadi d'atun dalla 6. classa

Las scolaras ed ils scolars dalla 6. classa han passentau in viadi d'atun fetg variont ed informativ. La damaun essan serendi a Mustér cun tren, nua che nus havein fatg ina viseta alla manufactura da Zai AG. Suenter che dus luvrers han instruiu nus, han tuts astgau gidar a construir in ski. Che quei ei gnanc aschi sempel sco ei para, han las scolaras ed ils scolars pia saviu evenimentar sezs. Cu ils skis ein allura stai fini, ein els vegni pressegiai cun ina forza da varga 40t.

Per la producziun d’in tal ski vegn fatg diever da material fetg prezius. Il pli fascinont ei che la firma integrescha schizun crap en lur skis. Plinavon havein nus retschiert fetg interessantas impressiuns ed informaziuns dalla fatschenta cun fetg grond renum sigl entir mund. Ils skis dalla marcai Zai san ins numnadamein schizun cumprar a Londra. Cordial engraziament persuenter! 

Silsuenter havein nus priu igl auto da posta tochen a Curaglia. Leu havein nus sco emprem dau in sguard ella resgia medelina e mirau empau sur la schuiala al resgiader. Che quella lavur ei stentusa e pretenda empau inschign, han ils affons beingleiti percurschiu. Aschia han las scolaras ed ils scolars saviu observar co ina buora vegn resgiada en aissas e quaders. Quei succeda cun agid da divers indrezs tecnics, ils quals lavuran a moda e maniera fetg exacta. Malgrad tut ils agids tecnics, sto il resgiader tuttina aunc tschappar en bia sez e luvrar cull’atgna forza. Sper las lavurs dil resgiader en resgia han ils affons era aunc empriu enzatgei davart il menaschi e l’organisaziun entuorn ina resgia. Engraziel zun fetg era per quellas impressiuns! 

Suenter ina cuorta pausa havein la finfinala entschiet nossa spassegiada sin la "Senda dils senns". Quella ha menau nus a Biscuolm, nua che nus havein fatg ina pausa da miezdi. Silsuenter essan nus serendi viers Pardatsch, nua che nus havein saviu observar entginas muntanialas. La canera d’enqualin da nus ha denton plitost spuentau las muntanialas ch’il cuntrari. Silsuenter essan serendi viers Gliarauns e la finfinala arrivai a Curaglia. Naven da leu essan puspei sesi egl auto da posta tochen Mustér, nua che nus havein priu il tren per Sedrun. 

 

fotografias da Sandro Tomaschett