slideshow_07.jpg

Til da latiarnas

Duront il temps da november cu ils dis vegnan pli cuorts eis ei surtut ella bassa usitau da menar atras tils da latiarnas per render empau glisch en quei temps. Era uonn ha in til da latiarnas giu liug a Sedrun en collaboraziun cun la gruppa da termegliar Ils Pluscheins e la scoletta.

 

 

La sera dils 18 da november ein affons, geniturs, tats e tattas serimnei avon la garascha dils transports Monn per guder communablamein il til. Entgins aspectaturs han admirau il pign spectacul naven dalla punt da Bugnei, pertgei la via dil til menava dalla Val si entochen a Bugnei. Duront caminar ha mintg’affon giu lur latiarna envidada enta maun ch’els han zambergiau cun bia premura duront las uras da termegliar tier il Pluscheins ni duront il temps da scoletta. Denteren cantavan ils affons la canzun “Jeu mon cun mia latiarna e mia latiarna cun mei….”. Las bialas vuschs carinas han enqual mument fatg pial gaglina e dau ina biala tempra a quei til.

Arrivai avon caplutta a Bugnei ha ei dau per l’entira raspada serimnada suppa da zetgas, vianesas cun terschola ed in té cauld.

La sentupada, las paterladas ed igl entir eveniment ha plaschiu e tgisà sche quei daventa forsa era ina pintga tradiziun en nossa Val.