Mintg’onn organisescha l’uniun tetgala dallas bibliotecas Svizra ina notg da raquents tier in tema ed uonn ei igl accent staus “viadi dil temps”. Cun ils affons dalla scoletta ed 1. e 2. classa havein nus fatg in viadi anavos el temps cun ils raquents dils cudischs da maletgs d’Aluis Carigiet. L’inscenaziun da quella sera ha giu liug el museum la Truaisch che raquenta cun las stanzas ed ils objects fetg real il temps da ca. avon 100 onns nua ch’ei deva negin’electricitad e la glieud haveva en calzers cun guotas. Ils affons han aschia survegniu il sentiment dad esser part dallas historias.
Sustegn havein nus giu dils scolars dil 3. sclalem ault che han raquintau las historias da Maurus e Madleina e da Zocla, Zila e Zepla. Era Tarcisi Hendry ha procurau cun sia savida per interessants impuls. In cordial engraziel fetg a tut las persunas che han possibilitau als affons tuatschins ina nunemblideivla notg da raquents.
