Duront la davosa jamna avon las vacanzas da Nadal essan nus sefatschentai cul tema art. Nus havein empriu d’enconuscher differentas parts e spartas da quei vast tema. Il gliendisdis ed il mardis vein nus visitau en quater gruppas differents ateliers. En in atelier vein nus astgau luvrar cun l’artista Ursula Stalder da Lucerna ch’ei dil mument la vigiladra dalla tuor dil Pass Alpsu.
Ils affons han luvrau en gruppas mischedadas da tuts scalems da nossa scola. Igl ei stau in bi mirar co ils gronds, ils mesauns ed ils pigns han luvrau ensemen, gidau in l’auter, susteniu in l’auter, motivau la gruppa ed aschia vinavon. Quei mereta in fetg grond cumpliment per tuts scolars e tuttas scolaras da nossa scola. Quei veis vus fatg grondius.
La mesjamna ein tuts serimnai en scola per sereparter en gruppas mischedadas tier differents posts da sport. Igl ei stau in avonmiezdi en moviment, quei ch’ei era ina moda dad exprimer art. Las gruppas ein semesiradas ed il venderdis ha ei dau la rangaziun.
La gievgia ei la scoletta, l’emprema e la secunda classa semess sin via a Mustér. Leu han ils scolarets, las scolarettas, ils scolars e las scolaras cun lur scolastas astgau visitar igl artist indigen Linus Flepp, in grond engraziament ad el per sia purschida.
La 3.-6.classa ed il scalem ault ein viagiai cul tren entochen Cuera. Leu han els visitau il museum d’art ed ein spassegiai tras il marcau da Cuera e contemplau differentas sculpturas, maletgs d’art che sesanflan ordaviert.
Il venderdis, il davos di da nossa jamna da project, il davos di avon las vacanzas da Nadal, han las differentas classas passentau en lur stanzas da scola cullas scolastas ed ils scolasts da classa.
Ina gruppa da scolars dil scalem superiur ha preparau ensemen cun lur persunas d’instrucziun duront igl avonmiezdi in bien e gustus gentar.
Da miezdi essan nus serimnai tuts en sala da gimnastica dalla scola e magliau da cuminonza. Ils macaruns han gustau aschi bein che las scadialas ein stadas vitas enteifer in cuort temps.
Sco finiziun havein nus fatg la rangaziun dalla mesjamna e lu cantau communablamein canzuns da Nadal. Il cant final ei staus fetg bials ed ha schenghegiau a nus in bi e custeivel mument d’Advent.