Gievgia, ils 22 d’uost 2024
La gievgia endamaun essan nus sentupai allas 8:15 avon scola. Cun il bus essan nus carrai a Curaglia. Naven da leu ha il viadi entschiet cun ir a pei. Igl ei iu detg bein da viandar ensi. Gia all’ entschatta han ins sentiu ch’ei deva duas gruppas, numnadamein ils sperts ed ils plauns.
Nus mavan adina in toc a pei e denteren havein nus fatg enqual pausa per che tuts possien suenter.
Cu nus essan arrivai datier dil Péz Ault ha il scolast fatg duas gruppas. Ina gruppa ei ida sil Péz Ault cul scolast Maurus e l’autra ei ida cul scolast Manfred in’autra via pli pacifica.
La gruppa ch’ ei viandada sil Péz Ault ei stada fetg sperta ed ei stada sisum entuorn las 12:00. L’autra gruppa ei ida circa duas uras e suenter fatg ina pausa da miezdi.
Suenter ina pausa da miezdi ei la gruppa dil Péz Ault semessa sin via dad ir engiu encunter la tegia Camona da Medel. Duront che la gruppa dil Péz Ault ei semessa sin via e tschella gruppa che ha fatg empau pli pacific era semessa sin via encunter la tegia.
Cu las gruppas ein sentupadas eran els gia sin via tier la tegia.
La via tier la tegia era detg stupenta.
Sillas treis eran tuts si e tuts eran fetg staunchels e miez caput, denton era ventireivels cun aschi ina biala cuntrada e survesta fantastica.
Suenter che nus essan arrivai sin tegia havein nus drizzau en las combras. Allas sis ha ei dau tscheina. Nus havein magliau ina suppa, salata e macruns d’alp. Suenter la tscheina essan nus i ordaviert e sesi giu e contemplau la rendida dil sulegl.
Tuttenina havein nus viu dus giuvens capricorns e nus essan surstai fetg, bellezia.
Pli tard han ils scolasts clamau nus e detg ch’ei detti dessert. Ils buobs han buca pudiu magliar il dessert perquei ch’ els han stuiu magliar tut ils rests da tscheina. Silsuenter havein nus stuiu dar giu ils telefonins.
Spert ein tuts sepinai per ir a letg e sedurmentei allas diesch perquei che tuts eran fetg staunchels.
Venderdis, ils 23 d’uost 2024
Suenter ina liunga notg essan nus sedestedai. Plein stauncladad essan nus i a solver. Ei ha dau bien te, caffè, suc d’oranschas e latg cauld.
Suenter quei bien solver essan nus i a pachetar nies grev sacados per semetter sin viadi.
Suenter s’unscher cun etg da sulegl essan nus viandai tras in liug plein nuorsas e tgauns. Per cletg era il pastur leu ed ha pertgirau nus dils tgauns. Duront ig ir a pei ha nies scolast Manfred discussiunau dad ina massa temas e tematicas. Suenter circa 30 minutas havein nus entupau in fetg gnoc affon cun sia mumma e siu tgaun.
Tuttenina ei il temps ius ualti spert e nies scolast ha fatg ina cuorta pausa per magliar nies minipic. Duront quella pausa vein nus giu ina biala survesta sils glatschers e sillas muntognas nundescriviblas.
Per cletg eisi iu igl entir temps dalla Val Sumitg engiu, da caminar ensi ei bia pli stregn. Il davos havevan nus mo pli pauc motivaziun dad ir a pei. Denteren essan nus era sescarpitschai sur la crappa perquei che nossas combas eran staunclas. Suenter 5 uras viadi essan nus arrivai cuntentamein ella Val Sumvitg nua ch’il bus spitgava gia sin nus. Nus essan stai fetg leds dat ir a casa e seruassar.
Igl emprem che tuts han fatg ei stau dad ir a far ina bellezia duscha caulda ni freida. Aschia havein nus saviu durmir fetg bein e tgunsch. Quei viadi vegnin nus mai ad emblidar e schizun semiar bi da quel.
