Uonn ha il Sontgaclau visitau ils affons dalla scoletta la sera. Mintg’affon ha astgau envidar siu tat ni sia tatta per quella viseta. Ensemen essan nus i da Rueras enviers il campadi. La via sclarevan tgei cletg las latiarnas che mintgin haveva zambergiau cun bia premura. Ei ha buc cuzzau ditg e gia ei il Sontgaclau vegnius encunter a nus cun ses dus fumegls ed igl asen. Il Sontgaclau ha priu peda per scadin affon ed era tedlau cun plascher il verset e la canzun dils affons. Sco davos ha il Sontgaclau surdau ils satgets zambergiei dils affons naturalmein empleni cun deliciusas caussas. Igl ei stau ina biala sera che ha schau glischar ils egls da pign e grond.
