neginas structuras dil di
Sin fundament dalla munconza d'annunzias porscha la Scola Sedrun neginas structuras dil di pigl onn da scola 2018/19.
Il mardis e la gievgia da miezdi vegn denton purschiu ina meisa da miezdi.
bialas vacanzas
La Scola Sedrun giavischa a tuttas e tuts bialas ed emperneivlas vacanzas da stad! Nus sevesein puspei gliendisdis, ils 20 d'uost.
uraris (provisoris) 2018/19
classas
Cheu sura anfleis vus ils uraris provisoris pigl onn da scola 2018/19. Tier singuls uraris sa ei tut tenor situaziun aunc dar midadas. Quellas vegnan denton communicadas aschigleiti che quellas ein enconuschentas.
pign campiunadi mundial da ballapei en scola
Rimnar paninis e spitgar vess sin ils giugs da ballapei en Russia ei naturalmein era in grond tema en scola e scoletta sper tut la materia da scola.Aschia havein nus decidiu da far in pign campiunadi da ballapei culs affons dalla 6avla classa e la scoletta.
Las gruppas ein vegnidas mischedadas ulivamein tenor vegliadetgna. Ils affons han eligiu ina tiara per lur equipa e lu han ils giugs amicabels entschiet. Mintg’equipa ha giugau ina cun l’autra ed ils resultats han tradiu tgi che gioga encunter tgi el miez-final. Il secund di da giug ha giu liug il miez-final ed il final. Tut ils affons, grond e pign han schau plascher e gudiu ils giugs.
Naturalmein che mintga equipa havess gudignau bugen ed atgnamein era fadegiau, pertgei igl ei vegniu giugau cun respect e fair - ina buna experientscha. Ils campiuns da nies campiunadi da ballapei ei la Frontscha stada e cun plascher han els survegniu surdau in bucal.
E tgisà, forsa gudogna era la Frontscha il campiunadi en Russia.
exposiziun da scola 2017/18
La finiziun digl onn da scola 2017/18 ei l'exposiziun tradiziunala puspei stada sil program. Duront quella sera han geniturs, parents ed interessai giu la caschun da prender investa ellas lavurs dallas scolaras e dils scolars dalla Scola Sedrun. Cun plascher havein nus astgau constatar ch'ina pluna glieud ha dau suatientscha agl invit e schau plascher noss'exposiziun culs products dils affons. Plinavon han uonn giu liug diversas producziuns da cant, las qualas han medemamein carmalau ina roscha persunas ell'aula. Entginas impressiuns dalla sera anfleis vus cheu sut.
di da sport 2017/18 - scalem superiur
Venderdis, ils 15 da zercladur, ha il di da sport communabel cun Mustér dil scalem superiur giu liug a Rueras. Las giuvnas sportistas ed ils giuvens sportists han astgau guder posts varionts sut il motto "plausch". Cheu sut saveis vus prender investa els differents pensums ch'ils giuvenils han giu d'absolver.
di da sport 2017/18 - scalem primar
Venderdis, ils 15 da zercladur, ha il di da sport communabel cullas scolas da Mustér e Medel dil scalem primar giu liug el Center da sport e cultura a Mustér. Las scolaras ed ils scolars ein vegni parti en 18 gruppas ed han absolviu en tut 14 posts; leudenter giugs enconuschents, sco era giugs che han pretendiu concentraziun e buna collaboraziun enteifer la gruppa. Entginas impressiuns da nies di da sport anfleis vus cheu sut.
